Komisioni Evropian përshëndeti hetimet e Ukrainës mbi akuzat për korrupsion, por theksoi se “do të nevojitet përparim i mëtejshëm në të ardhmen”. Zëdhënësi nuk komentoi listën në rritje të dorëheqjeve të qeverisë në Ukrainë, të lidhura me një hetim korrupsioni.
Megjithatë, ai nënvizoi se masat kundër korrupsionit janë një kusht i rëndësishëm për mbështetjen e vazhdueshme financiare si dhe për anëtarësimin e ardhshëm në BE.
”Komisioni Evropian është në kontakt të ngushtë me Kievin për të siguruar që ndihma e dërguar në Ukrainë të ketë garanci që fondet të përdoren mirë”, theksoi zëdhënësi.
Pavarësisht polemikave të vazhdueshme dhe një raporti kritik mbi korrupsionin në Ukrainë nga kontrollori më i lartë i buxhetit të BE-së, Komisioni Evropian mbrojti përparimin e vendit deri tani.
