Dhuna në familjet shqiptare nuk ndalet. Në një nga dosjet hetimore që disponon Vizion Plus thuhet se viktimë ka rënë një nënë e 4 fëmijëve. E reja ka tentuar të pajiset me urdhër mbrojtje që në 2019, por si pasojë e frikes ka tërhequr deklaratën. Përgjatë 2 viteve, deri në marrjen e urdhrit të menjëhershëm të mbrojtjes në maj të 2021 nga Gjykata e Vlorës gruaja ka rrëfyer në faqe të tëra të dosjes për dhunën e ushtruar nga bashkëshorti i saj.
Dështimin e urdhrave të mbrojtjes e pranojnë edhe avokatët.
“Edvis Gorishta- Avokat
Janë shumë raste të shpeshta dhe në shumicën e rasteve janë thyer urdhërat e mbrojtjes. Pra, i padituri ose dhunuesi është munduar ta kërcënojë ose kontaktojë viktimën.”
Qendrat sociale, të cilat janë një nga alternativat për strehimin e viktimave të dhunës avokatët i shohin si kufizim lirie.
“Dy raste që unë kam patur nuk kanë shfaqur atë vullnetin që të qëndrojnë aty se iu ështe dukur sikur është një vend i mbyllur dhe do të ndiheshin më të lira po të qëndronin jashtë.”
Ndërsa, për psikologen Arjana Muça, institucionet nuk duhet të reshtin së mbajturi nën kontroll dhunuesin, në mënyrë që të parandalohet dhuna e mëtejshme.
“Arjana Muça – Psikologe
Që të zbatohet një urdhër mbrojtjeje duhet patjetër institucionet ta ndjekin zbatimin e atij urdhëri. Pra, nuk duhet të ndalemi vetëm në dhënien e një urdhëri të mbrojtjes dhe të presim qe dhunuesi të zbatojë atë që jepet si ndalesë. Zakonisht bëhen reforma, reforma që duhet të jenë të prekshme dhe të ndjeshme te pjesa e popullsisë. Ndonjëherë këto reforma janë vetëm abuzive, nuk arrijnë të ngrenë mirëqenien e shoqërisë dhe problemet sa vijnë e thellohen.”
Vetëm në 4 muajt e parë të vitit, Gjykata e Tiranës ka lëshuar 132 urdhër-mbrojtje mes të cileve 101 janë të menjëhershëm.
