Shoqata e Ndërtuesve të Shqipërisë shpreh shqetësimin, se urdhri i Bashkisë për të ndaluar punën e makinave betoniere, ka paralizuar të gjithë sektorin dhe nëndegët e tij. Teksa flasim për rimëkëmbje ekonomike, pas dy fatkeqësive natyrore, Bashkia me urdhrin e saj të fundit po i “mer frymën” ndërtimit, sektorit më jetik të ekonomisë. Mbi të gjitha, kjo situatë përsëritet çdo vit.
“Çdo vit kemi të njëjtën problematik. Është fakt që ndërtimi është sektori më i goditur në vijimësi dhe më lehtë. Goditet me taksa dhe tatime si asnjë sektor tjetër dhe me urdhra të njëanshëm. Punët e nisura parashikojnë kontrata të lidhura me afate konkrete, por këto afate nuk do të kapen në kohë, pasi puna është e paralizuar. Nëse kontratat nuk mbyllen sipas parashikimeve, aplikohen penalitete”, u shpreh Ilir Hebovija nga Shoqata e Ndërtuesve në emisioni “E-ZONË”.
Ndërtuesit dhe prodhuesit e betonit shpresojnë në gjetjen e një kompromisi me Bashkinë e Tiranës, në mënyrë që të mos pengohet puna, në të kundërt, ata paralajmërojnë se do të përshkallëzojnë qëndrimin e tyre.
