Sali Berisha është paditur në SPAK nga familja Haklaj për 4 akuza të rënda nga banda e armatosur, vrasja me paramendim, terrorizëm, deri të kryerja e krimeve në kuadër të organizatës kriminale. Kallëzimi mban emrin e Muharrem Haklajt, babait të 4 djemve të vrarë, dhe motrës së tyre, Zylfie Haklajt.
Pas kësaj padie, motra e madhe e shtëpisë Aishe Haklaj, kthyer nga Suedia, ku ka fituar azilin politik, është marrë në pyetje nga organi i akuzës, i përfaqësuar nga Altin Dumani dhe Elida Kaçkini.
Halil, Shkëlqim, Fatmir dhe Ylli haklaj, sipas familjarëve të tyre janë vrarë me urdhër të ish-presidentit të kohës, Sali Berisha, por ekzekutimi i këtij urdhëri është kryer nga 15 persona të tjerë.
Avokati i familjes Haklaj, Idajet Beqiri, në kallëzimin e dorëzuar në SPAK pretendon se ka prova të konsiderueshme që implikojnë personat e mësipërm në vrasjen e 4 djemve të familjes Haklaj të Tropojës dhe për t’i mbrojtur këto prova ai garanton edhe një sërë dëshmitarësh.
