David J. Kostelancik, i emëruar nga Presidenti Biden për të shërbyer si Ambasador i Shteteve të Bashkuara në Shqipëri, parashtroi kete te enjte para komisionit për marrëdhëniet me jashtë në senat prioritetet e punes se tij.
“Nëse konfirmohem në këtë detyrë do të bashkëpunoj me Shqipërinë për të forcuar institucionet demokratike dhe institucionet e drejtësisë. Presidenti Joe Biden e ka përcaktuar luftën ndaj korrupsionit dhe krimit të organizuar si pjesë të strategjisë sonë kombëtare. Kjo është një sfidë kryesore për vendet e Ballkanit Perëndimor. Përparimi i reformës në drejtësi do të ndihmojë përparimin e Shqipërisë drejt integrimit europian.
Sipas ambasadorit një nga prioritetet do te jete edhe forcimi i mëtejshëm i partneritetit në fushen e mbrojtjes per tu mbrojtur nga sulmet kibernetike.
Sulmi kibernetik i Iranit ndaj Shqipërisë në vitin 2022 tregoi nevojën për të investuar në infrastrukturë dhe trajnime për të ndërtuar një sistem të qëndrueshëm. Shtetet e Bashkuara , kanë dërguar ekspertë në Shqipëri për të riparuar dëmet e bëra dhe kanë ofruar 50 milionë dollarë për këtë qëllim.
Kostelancik ka shërbyer në Shqipëri edhe në periudhën 1992-1994, si përfaqësuesi i parë për çështjet politike dhe ekonomike në ambasadën amerikane në Tiranë.Ai është një diplomat me një karrierë 30-vjeçare. Ka shërbyer dy herë në Ambasadën amerikane në Moskë, në misionet e SHBA-së në OSBE dhe NATO, si edhe në Ankara të Turqisë. Nëse kandidatura e tij miratohet nga Senati, diplomati Kostelancik do të zëvendësojë ambasadoren aktuale amerikane në Shqipëri, Yuri Kim.
