Mbetet ende mister vrasja e Shefki Kurtit, shqiptarit 71-vjeçar i cili u gjet i copëtuar në Itali më 28 korrik.
Hetuesit nuk përjashtojnë asnjë pistë, madje as faktin që Kurti mund të ketë kërkuar para nga fajdexhinjtë.
Sipas hetuesve, duket si një vrasje e “dështuar” e kryer nga një varës pa përvojë, i cili në panik ishte përpjekur të hiqte qafe trupin e viktimës duke e hedhur në kanalin e Adigettos.
Asnjë vrasës me përvojë nuk do të kishte zgjedhur ta bënte këtë.
Hetuesit po gërmojnë dhe po kërkojnë gjurmë në të kaluarën e viktimës dhe familjes së tij.
Në gamën e hipotezave është dhe pista që dikush nga familja është mbështetur te ndonjë fajdexhi për të marrë para hua.
Nëse po, bëhet fjalë për para që nuk mundi t’i kthente kurrë.
Dhe vrasja do të ishte frikësuese: Nëse nuk paguani edhe të dashurit e tjerë do të përfundojnë si Shefkiu.
Ditën e djeshme pas një kontrolli fillestar nga departamenti i mjekësisë ligjore të komandës krahinore të Arma di Rovigo, mbërritën nga Parma ekspertët e RIS, të cilët kontrolluan centimetër pas centimetri të gjithë banesën që viktima ndante me gruan e tij në via Girardini 78.
Për të kuptuar se çfarë kërkojnë hetuesit, është mirë të bëjmë një hap prapa dhe të përmbledhim shkurtimisht fazat e krimit të tmerrshëm që tronditi të dyja anët e Adigeve: Nga njëra anë Badia, ku jetonte viktima, dhe nga ana tjetër Masi, ku jeton djali që tani ka strehuar edhe nënën e tij, e cila ka mbetur e pastrehë nga sekuestrimi i banesës.
Më 22 korrik, siç u deklarua nga fëmijët, 71-vjeçari u largua nga shtëpia dhe nuk u kthye më. Në atë moment familja Kurti nuk kishte hipotezuar një zhdukje, por një largim vullnetar. Kur telefonuan policinë, familjarët deklaruan se burri kishte braktisur shtëpinë pas një debati me gruan pa marrë asgjë me vete, madje as celularin.
Mëngjesin e 28 korrikut, në kanalin e Adigetto në Villanova del Ghebbo, disa teknikë që punonin për pastrimin e këtij kanali gjetën këmbën e një burri mes mbeturinave të marra nga lumi. Janë thirrur karabinierët, të cilët me zjarrfikësit kanë nisur të kontrollojnë kanalin.
Po atë ditë më tej në rrjedhën e sipërme, u gjetën dy çanta, me kokën dhe bustin e një burri. Pasditen e ditës pasardhëse, në Villanova del Ghebbo, jo shumë larg vendit ku u gjet këmba, dy krahë u gjetën në dy çanta të tjera.
Familjarët e viktimës e njohën Shefki Kurtin falë një tatuazhi që shqiptari kishte në njërën nga këmbët.
Po pse u masakrua kaq brutalisht një 71-vjeçar, që të gjithë thonë se nuk ka armiq?
Nëse në fillim çështja dukej se kishte zgjidhje të thjeshtë, ditët në vijim hetimet treguan se çështja ishte shumë më komplekse. Ndërkohë është zgjedhur rrjedha e kanalit të Adigettos për të hequr qafe kufomën.
Por kush do të zgjidhte një kanal kur lumenjtë e mëdhenj Po dhe Adige janë kaq afër?
Kjo bëri që hetuesit të mendojnë se vrasësi ishte një person i papërvojë, por tani po hetohet ideja se vrasësi ka dashur që policia të gjejë trupin e tij.
Pse?
As për këtë pyetje nuk ka përgjigje të qarta, por supozohet se ndoshta mund të jetë një “paralajmërim.”
Kujt?
”Edhe këtu jemi në fushën e supozimeve dhe për këtë duhet të gërmojmë në jetën e viktimës dhe të familjarëve për të gjetur një motiv”, deklarojnë hetuesit.
Disa prej tyre mund t’i kenë mbetur borxhli ndonjë fajdexhiu, i cili për të shtyrë një të afërm të paguajë borxhin, së pari vrau burrin, duke premtuar se do të detyronte një anëtar tjetër të familjes të bënte të njëjtën gjë nëse nuk shlyhej borxhi.
Gjithashtu hetuesit nuk kanë mundur të zbulojnë se ku është kryer copëtimi i trupit.
Prerja e një trupi në copa është një operacion që, nëse trupi nuk është ngrirë fillimisht, shkakton rrjedhje të madhe gjaku. Vështirë për t’u pastruar pa lënë gjurmë.
Hetuesit po punojnë edhe në këtë drejtim. Ndërkohë që po analizohet edhe celulari i viktimës, ai u gjet në shtëpinë e 71-vjeçarit, ende ndezur.
