Të tjera të dhëna sensitive janë publikuar nga hakerat iranianë. Këtë herë bëhet fjalë për një material ku përfshihen emailet e kreut të SHISH-it Helidon Bendo.
Hakerat i kanë publikuar këto të dhëna në telegram. Nga të dhënat paraprake mësohet se janë bërë publike më shumë se 500 emaile të drejtorit të SHISH-it. Ajo që e bën më të rëndë situatën është fakti se në emaile ka edhe të dhëna konfidenciale të sistemeve shqiptare.
Ndër to janë komunikime të agjentëve të shërbimit informativ, strategjitë e antiterrorit dhe të sektorit të krimit kibernetik, planet e masave për aktivitetet qeveritare etj. Nuk mungojnë as vendimet dhe urdhrat e dala nga zyra e Kryeministrisë për strukturat e posaçme të sigurisë kombëtare.
Sulmi është i ngjashëm me hakerimin e emaileve të ish-drejtorit të përgjithshëm të policisë Gledis Nano. Nuk është hera e parë që SHISH është në qendër të sulmeve të hakerave. Më herët ata publikuan të dhënat personale të Helidon Bendos dhe të bashkëshortes së tij.
Por edhe Policia e Shtetit është goditur disa herë nga sulmet kibernetike, ku u publikuan të dhënat e sistemit TIMS, hyrjet e daljet e kryeministrit Edi Rama, pamjet nga kamerat e sigurisë, listat e punonjësve të policisë së shtetit etj.
