Një ngjarje e rëndë ka ndodhur në Belgjikë, ku një shqiptar nga Kosova ka vrarë në sy të fëmijëve të tij të mitur partnerin e ish-bashkëshortes.
E gjitha kjo ka ndodhur pranë shkollës Waterbaan në Deurne-Zuid.
Disa prindër që po prisnin në portën e shkollës dëshmuan faktet e tmerrshme të hënën pasdite: “Kemi dëgjuar shumë të bërtitura dhe pamë dikë që binte nga biçikleta e tij.”-thotë një çift që preferoi të mbetej anonim. “Çiklisti ishte shtrirë në tokë, ndërsa një burrë u përkul mbi të dhe e goditi disa herë në qafë.”
Sipas medieve lokale, sulmuesi përdori një kaçavidë në sulm. Ndërsa disa prindër nxituan në ndihmë të viktimës dhe thirrën shërbimet e urgjencës, burri u largua i qetë. E gjithë skena u kap në kamerat e sigurisë.
“Me gjakun që pikonte nga duart e tij, ai u largua qetësisht. Ai nuk u shqetësua dhe vazhdoi të ecte”, thanë dëshmitarët. Ftohtësia e sulmuesit i tronditi ata: “Ai ishte i veshur me të zeza, mbante syze dielli të zeza dhe ishte tullac. Dukej sikur ai doli nga një film, si Hitman”.
Policia arrestoi të dyshuarin, i cili u zbulua se ishte nga Kosova dhe u identifikua si Bekim. A., 48-vjeç.
Viktima nga ana tjetër është identifikuar si Ismet Osmanay, 52 vjeç.