Shqiptarët po blejnë gjithmonë e më shumë on line, një dukuri që u zhvillua veçanërisht pas periudhës së pandemisë.
Të dhënat zyrtare të INSTAT tregojnë se për vitin 2020, gati 1 në 5 persona bëri blerje përmes platformave në internet, apo rrjeteve sociale: kryesisht për veshje, këpucë dhe aksesorë, por edhe për produkte të tjera si ushqimet në supermarkete, apo produkte të tjera shtëpiake.
Anketa të tjera tregojnë se fenomeni është më i përhapur, ku llogaritet se gati 60% e popullsisë ka bërë porosi online nëse përfshijmë edhe vitin 2021.
E-commerce mbetet industria me potencialin më të lartë në Shqipëri. Kjo për faktin se ka qenë shumë pak e zhvilluar dhe shqiptarët kanë qenë tradicionale në blerjet e tyre, duke preferuar dyqanet fizike.
Por lulëzimi i tregtisë online shoqërohet edhe me problematikën e informalitetit të lartë. Pasi shumë faqe që ofrojnë produkte janë tërësisht informale, të paregjistruara dhe pa një adresë, çka përbën rrezik për konsumatorët.
