“Katër stinët” e Vivaldit u shpërfaqën me shije dhe mjeshtëri në një koncert të veçantë, që u mbajt mbrëmjen e 8 marsit në Liceun Artistik.
Violinistja e njohur shqiptare, Suela Piciri, e cila sot është pjesë e orkestrës së teatrit të madh italian “La Scala”, përcolli një frymëzim të ri përmes notave që kanë udhëtuar në shekuj.
Nga skenat e mëdha, në pikënisjen ku mori krahë, Suela Piciri kthehet gjithmonë me emocion dhe mirënjohje e modesti.
“Kam shumë emocione të veçanta kur performoj përpara miqve, kolegëve e sidomos në praninë e pedagogëve të mi, pa prezencën e të cilëve nuk do të isha këtu ku jam sot dhe i falenderoj shumë nga zemra”, tha violinistja Suela Piciri.
Duke u shoqëruar nga instrumentistët e SinfoArt Orkestra, solistja Suela Piciri dhuroi magjinë e saj artistike nën titullin: “Katër stinë, e njëjta grua”./vizionplus.tv