Bashkimi Evropian ka arritur një marrëveshje të përkohshme më 20 mars që u jep prodhuesve ushqimorë ukrainas qasje pa tarifa në tregun evropian deri në qershor të vitit 2025, megjithëse ka kufizime të reja në importet e drithërave.
Komisioni Evropian propozoi në janar të pezullojë detyrimet dhe kuotat në prodhimin e fermave ukrainase edhe për një vit tjetër, me një “frenim urgjent” për shpendët, vezët dhe sheqerit, duke çuar në vendosjen e tarifave nëse importet tejkalojnë nivelet mesatare të vitit 2022 dhe 2023.
Megjithatë, pas muajsh protesta të fermerëve lidhur me rregullat mjedisore të BE-së dhe për importet e lira, ligjvënësit e BE-së shtyn përpara zgjerimin e listës urgjente në prodhimin e importeve të tjera bujqësore dhe shtuan vitin 2021 si vit referimi. Një gjë e tillë u parapa para se Rusia të niste pushtimin e Ukrainës, kur eksportet ukrainase në BE u frenuan nga tarifat dhe kuotat.
Negociatorët nga Parlamenti Evropian dhe Presidenca belge e BE-së u pajtuan mëngjesin e së mërkurës që të shtojnë në listë tërshërën, misrin, drithërat dhe mjaltin, duke mbajtur kufizimin e mesatares së importeve të vitit 2022 dhe 2023.
Negociatorët u pajtuan që Komisioni do të vepronte brenda 14 ditësh, në vend se 21 ditë sa ishte paraparë fillimisht, nëse do të arriheshin nivelet e duhura të importeve.
Fqinjët e Ukrainës që janë në BE – Bullgaria, Hungaria, Polonia, Rumania dhe Sllovakia – janë ankuar se importet bujqësore kanë zemëruar prodhuesit e tyre, duke çuar në protesta të fermerëve dhe ndalesa të importeve. Dërgesat në këto shtete janë rritur pasi nisja e pushtimit rus të Ukrainës pengoi eksportet përmes rrugës tradicionale të Detit të Zi.
Kievi tha se eksportet bujqësore nuk po dëmtojnë tregjet në BE, veçmas tani që 95 për qind e eksporteve bujqësore të Ukrainës kalojnë përmes Detit të Zi.
Ukraina po ashtu tha se vendimi i BE-së është i pranueshëm. Kjo marrëveshje e përkohshme duhet të miratohet nga Parlamenti Evropian dhe qeveritë e BE-së dhe vendimi për të ka gjasë të merret në prill. /REL