Tetë politikanë kandidat për president të Komisionit Evropian u përballën në debatin e parë mes tyre, pak më shumë se një muaj përpara zgjedhjeve të unionit.
Debati i cili u dominua nga presidentja aktuale Ursula Von Der Leyen kishte në fokus kryesisht, sigurinë e kontinentit, ndryshimet klimatike dhe luftën në Ukrainë, por edhe në lindjen e mesme.
“Evropa na ka sjellë kaq shumë paqe, liri, prosperitet por sot, ajo për të cilën jam vërtet e shqetësuar është se këto vlera janë nën sulm, nga brenda dhe nga jashtë”, tha Ursula von der Leyen.
Sa i takon luftës në Gaza, Von Der leyen tha se arritja e një armëpushimi është emergjente.
“Gjithashtu kemi nevojë për lirimin e pengjeve. Dhe duhet të ulemi e të punojmë për një zgjidhje me dy shtete, sepse kjo është e vetmja zgjidhje që do të sjellë paqe në rajon”, u shpreh ajo.
Por sa i takon çështjeve klimatike presidentja e komisionit europian mori kritika të forta nga të gjelbrit
“Fatkeqësisht, zonja Von Der Leyen, ajo që kemi parë është se ju po e zbehni dhe po zbutni aq shumë marrëveshjen e gjelbër e cila është në dëm te fermerëve tanë”, tha Bas Eickhout, nga Partia e Gjelbër Evropiane.
Anders Vistisen kandidate nga ekstremi i djathtë europian tha se Bruksel është kthyer në një moçal, ndërsa premtoi se nëse fiton do të fillojë spastrimin në themel.
“Von Der leyen, ju do të jeni personi i parë që do të shkarkojmë pas zgjedhjeve”, tha Vistisen.
Por kandidatja e të djathtës u sulmua nga të gjithë kandidatët e tjerë për një sërë çështjesh përfshirë akuzat për ndikimin rus dhe kinez. /vizionplus.tv