President i SHBA, Joe Biden ka reaguar për deklaratat e ish-kreut të Shtëpisë së Bardhë Donald Trump, që vunë në dyshim përkushtimin amerikan për t’i mbrojtur nga sulmet aleatët e vet në NATO.
Nga shtëpia e bardhë, Biden i quajti komentet e trump të rrezikshme të turpshme dhe shokuese.
“E imagjinoni dot një ish president të SHBA duke e thënë këtë gjë? E gjithë bota e dëgjoi. Dhe më e keqja është që ai e mendon vërtet atë që thotë. Asnjë president tjetër në historinë tonë nuk është përkulur kurrë para një diktatori rus. Kur Amerika thotë fjalën e saj ne e mbajmë atë, NATO është një aleancë e shenjtë”, u shpreh Biden.
Trump tha të shtunën se dikur kishte paralajmëruar se do ta lejonte Rusinë të bëjë çfarë të dojë me vendet anëtare të NATO-s të cilat nuk e përmbushin zotimin për t’i shpenzuar 2 për qind të produktit të brendshëm bruto për mbrojtjen.
Gjatë kohës kur ishte president, Trump kritikonte shpesh vendet europiane se nuk po paguanin mjaftueshëm për mbrojtjen e vet. Edhe administratat e tjera amerikane i kanë akuzuar evropianët për shpenzime të pamjaftueshme në mbrojtje, por me ton më të butë.
Deklaratat e fundit të Trump u kritikuan ashpër nga zyrtarë të lartë të perëndimit duke e akuzuar ish presidentin se po dëmtonte sigurinë e të gjithëve në një kohë luftrash në botë. /vizionplus.tv