Lionnel Messi nuk do të jetë më pjesë e Barcelonës duke nisur nga viti i ardhshëm. Gjashtë herë fituesi i “Topit të Artë” do të largohet nga “Camp Nou” pas 16 vitesh si katalanas. Lajmin e ka bërë të ditur vetë klubi katalanas në faqen e tij zyrtare.
“Të dyja palët kishin dëshirë të rinovonin kontratën, por ishte e pamundur për arsye ekonomike dhe strukturore të La Ligas spanjolle”, thuhet në njoftimin e klubit të Barcelonës.
Menjëhere pas këtij lajmi kanë filluar spekulimet se ku mund të vazhdojë karrierën “Pleshti” argjentinas. Kandidatët kryesorë duket se janë sheikët e Manchester City dhe PSG.
Pep Guardiola do ta mirëpriste yllin argjentinas në ishull tek City, të cilin e njeh shumë mirë që nga koha kur e stërviste tek Barcelona, por as milioneret e PSG nuk do to jenë pas në këtë garë duke e joshur Messin të luajë serish përkrah Neymar.
Se ku do të luaj Messi sezonin e ri kjo mbetet ende enigmë edhe për pak kohë, por e sigurt është që tifozët e Barcelonës kanë mbetur zemërthyer nga largimi i lojtarit me të mirë në botë.
Pamjet që vijnë nga jashtë “Camp Nou” janë trishtuese për tifozët e Barcelonës të cilët kanë nisur të vajtojnë largimin e Messit.
Një numër i madh i tyre janë grumbulluar para selisë së klubit me fanellat e argjentinasit si për të penguar këtë largim të tij.
Messi e mbyll me Barcelonën me 6 “Topa të Artë” të fituar dhe me 35 trofe me fanellën e katalanasve, 8 Superkupa të Spanjës, 7 Kupa Mbreti, 4 Champions League, 3 Superkupa të Europës dhe 3 Kupa Bote për klube.