Sudani po përballet me një një grusht shteti ushtarak ndërsa situata është kaotike.
Ministria Sudaneze e Inteligjencës ka konfirmuar se shumica e anëtarëve të kabinetit dhe këshillit kombëtar të sovranitetit që ndërmorën tranzicionin demokratik të vendit pas përmbysjes së Omar El Bashir në vitin 2019, janë arrestuar.
Në mesin e zyrtarëve që janë arrestuar është edhe kryeministri, Abdallah Hamdok. Autoritetet njoftuan se vendi po përballet me një grusht shteti ushtarak në shkallë të gjerë ndërsa ende nuk është e qartë se kush është udhëheqësi e ushtrisë.
Në kryeqytetin Kartum është ndërprerë interneti, ndërsa në rrjetet sociale janë shfaqur imazhe që tregojnë turma të zemëruara duke djegur goma në rrugë.
Aeroporti i Kartumit është i mbyllur dhe fluturimet ndërkombëtare janë pezulluar.
Grupi kryesor pro-demokratik i Sudanit u ka bërë thirrje mbështetësve të tij që ti rezistojnë çdo grusht shteti ushtarak duke protestuar.
Përfaqësuesi i Lartë i Bashkimit Evropian, Josep Borrell, shprehu shqetësimin e tij për zhvillimet e fundit në Sudan. “BE u bën thirrje të gjitha palëve dhe partnerëve në rajon që ta kthejnë procesin e tranzicionit politik në rrugën e duhur,” shkroi Borrell në Twitter.
Udhëheqësit ushtarakë dhe civilë kanë qenë në mosmarrëveshje që kur sundimtari Omar al-Bashir u rrëzua nga pushteti dy vjet më parë dhe u krijua qeveria e përkohshme.