Kryeministri i Hungarisë, Viktor Orban tha se për shkak të luftës ruso-ukrainase dhe kërcënimit ndaj Hungarisë, është shpallur “gjendja e jashtëzakonshme”, e cila hyri në fuqi në mesnatë, me qëllim marrjen e vendimeve të shpejta.
Në një deklaratë përmes Facebook-ut, Orban tha se nuk ishte e mundur të parashikohej se kur do të përfundonte lufta në Ukrainën fqinje dhe se qeveria, e cila bëri betimin dhe mori detyrën dje, kishte ndërmarrë një hap në këtë drejtim.
Ai shtoi se për shkak të luftës, qeveria duhet të veprojë shpejt dhe të marrë vendime për të mbrojtur Hungarinë, prandaj në përputhje me kushtetutën është shpallur gjendja e jashtëzakonshme, e cila hyri në fuqi në mesnatë.
Orban theksoi se lufta përbën një kërcënim për sigurinë fizike dhe ekonominë e Hungarisë dhe se vendi duhet të qëndrojë jashtë luftës.
Ai tha se vendimet e para të marra si pjesë e gjendjes së jashtëzakonshme do të shpallen sot.
Qeveria hungareze më parë ka vendosur gjendje të jashtëzakonshme për shkak të migrimit të parregullt dhe luftës kundër COVID-19.