Hungaria i ka vënë veto paketës së ndihmës prej 54 miliardë eurosh të Bashkimit Evropian për Ukrainën.
Në një postim në platformën “X”, kryeministri hungarez Viktor Orban bëri të ditur se në samitin e mbajtur në Bruksel, ata si shtet kanë refuzuar paketën e re të ndihmës financiare të Unionit për qeverinë në Kiev.
“ Veto për paratë shtesë për Ukrainën”, shkroi Orban në rrjete sociale.
Anëtarët e BE-së po përpiqeshin të ndryshonin qëndrimin kundërshtues të Hungarisë në mënyrë që të miratohej mbështetja e re financiare për Ukrainën dhe të fillonin negociatat e anëtarësimit.
Në bisedimet e pranimit pati mosmarrëveshje për shkak të Hungarisë, e cila u shpreh kundër vendimit të marrë nga vendet e tjera anëtare të bllokut.
Në fillim të kësaj jave, Orban pohoi se Ukraina duhet ende të plotësonte tre nga shtatë kushtet e nevojshme për bisedimet e pranimit dhe për rrjedhojë, nënvizoi se nuk kishte asnjë arsye aktuale për të negociuar anëtarësimin në BE për Kievin.
Kryeministri hungarez e quajti njoftimin se Ukraina po fillonte negociatat e pranimit “një vendim krejtësisht të pakuptimtë, irracional dhe të pasaktë”. /vizionplus.tv