Pamje të pashembullta në Izrael teksa mijëra njerëz, duke kundërshtuar protokollet shëndetësore, janë përplasur me autoritetet në funeralin e një rabini që humbi jetën nga Covid-19.
Pjesëmarrja masive ka shkaktuar një situatë kaotike dhe tërësisht të pamenaxhueshme nga forcat e policisë.
Vendosja e gardheve metalike dhe masave të tjera penguese, nuk ka funksionuar, raporton Vizion Plus.
Një panoramë e njëjtë u regjistrua edhe pak ditë më parë, në funeralin e një tjetër rabini i cili humbi jetën nga covid 19.
Përpara zgjedhjeve të 23 marsit, këto shkelje nga hebrenjtë ultra-ortodoksë konsiderohen si një qëndrim opozitar i cili ve në pikëpyetje efektivitetin e kufizimeve ndërsa vendi gjendet në një izolim të tretë mbarëkombëtar.
Kryeministri Benjamin Netanyahu ka premtuar se deri në muajin mars do të vaksinohet e gjithë popullsia. Deri më tani, Izraeli ka administruar më shumë se 5 milionë doza vaksine në një popullatë prej rreth 9 milionë banorësh.