Është urgjente që Bashkimi Evropian të zhvillojë një vizion të ri ndaj Ballkanit Perëndimor dhe të vendosë zgjerimin e rajonit ndër prioritetet e tij, deklaroi kryeministrja italiane, Giorgia Meloni në video-fjalimin e saj në hapjen e konferencës “Italia dhe Ballkani Perëndimor: rritje dhe integrim”, nën kujdesin e Ministrisë së Jashtme italiane dhe ministrit të Jashtëm Antonio Tajani, që po zhvillohet në Trieste.
”Një prani më e madhe e Italisë në Ballkan është qëllimi i kësaj qeverie”, theksoi ajo.
”Edhe kjo konferencë për Ballkanin që po zhvillohet në Trieste është një pjesë e këtij procesi”, deklaroi Meloni.
“Kjo është ajo që na kërkojnë të gjithë miqtë e rajonit, e kam vërejtur personalisht me rastin e samitit në Tiranë. Ne jemi protagonistë në rajon, por duhet ta rinovojmë këtë prani dhe të investojmë në sektorë strategjikë”, shtoi Meloni.