Kryeministri i Izraelit, Benjamin Netanjahu, ka dënuar ashpër dhunën e shkaktuar nga një grup ekstremistësh izraelitë në Bregun Perëndimor, pas një sulmi të ri ndaj një komuniteti palestinez në fshatin Jaba, pranë Betlehemit. Ngjarja ka nxitur reagime të forta në gjithë spektrin politik izraelit.
Kreu i opozitës, Yair Lapid, e cilësoi incidentin si një tjetër hap drejt përshkallëzimit të dhunës, ndërsa Yair Golan, udhëheqës i koalicionit të majtë “Demokratët”, foli për “terrorizëm hebre jashtë kontrollit”.
Në një deklaratë zyrtare, Netanjahu u shpreh se e trajton shumë seriozisht dhunën e nxitur nga ekstremistët, të cilët, sipas tij, “nuk përfaqësojnë kolonët izraelitë në Judé dhe Samaria” (siç e quan Izraeli Bregun Perëndimor). Ai premtoi se do të merret personalisht me çështjen dhe kërkoi nga ministrat përgjegjës të marrin masa të menjëhershme.
Sulmi ndodhi pak orë pas prishjes së një posti të paligjshëm të kolonëve hebrenj në zonën Gush Etzion, në jug të Jerusalemit, një operacion i kryer nga qindra policë dhe ushtarë që përdorën edhe buldozerë. Gjatë ndërhyrjes pati përleshje dhe forcat izraelite përdorën gazra tymues dhe mjete shpërthyese paralizuese.
Sipas vlerësimeve të para, sulmi në Jaba dyshohet të ketë qenë një reagim hakmarrës ndaj shembjes së këtij posti të kolonëve nga forcat izraelite të sigurisë.