Trupat e gjashtë burrave u gjetën të varur pranë një ure në qytetin Zacatecas në pjesën veri-qendrore të Meksikës të enjten, tha një zyrtar, në një rajon ku disa prej karteleve më të mëdhenj të drogës në vend po luftojnë mbi rrugët fitimprurëse të trafikimit.
Sipas Reuters, trupat gjysmë të zhveshur u zbuluan në orët e para të mëngjesit, tha burimi në prokurorinë lokale, duke kërkuar anonimitet pasi nuk u lejua të fliste publikisht për mediat. Gazetat meksikane gjithashtu raportuan gjetjen e tmerrshme.
Zacatecas, kryeqyteti i shtetit me të njëjtin emër, është goditur nga dhuna intensive muajt e fundit, pasi Karteli Sinaloa dhe rivali i tij më i madh, Karteli i Gjeneratës së Re Jalisco, po luftojnë për kontrollin e rrugëve kryesore të trafikimit.
Gjatë korrikut, 11 trupa u gjetën të varur nën ura në shtetin Zacatecas, disa të shoqëruar me mesazhe kërcënuese. Disa nga trupat u hodhën në komunat Fresnillo dhe Valparaiso, të cilat gjithashtu kanë parë rritjen e normave të krimit.
Rreth 536 njerëz u vranë në shtetin Zacatecas në gjashtë muajt e parë të vitit deri në qershor, një rritje prej 57% në të njëjtën periudhë të vitit të kaluar, sipas shifrave zyrtare.