Shkencëtarët e Organizatës Botërore të Shëndetësisë vizituan tregun në Wuhan, ku u raportuan rastet e para me COVID-19 një vit më parë. Tregu i kafshëve në qytetin kinez është mbyllur që prej janarit të vitit të kaluar pasi autoritetet vendase ngritën dyshime se kafshët mund të ishin burimi i shpërthimit të pandemisë.
Hetim ka për qëllim që të zbulojë origjinën e koronavirusit. Ekipi një ditë më parë vizitoi një spital në qytetin qendror të Wuhanit ku u trajtuan pacientët e parë me Covid. Mjekët kishin mbledhur mostra nga pacientët që vuanin nga një pneumoni e paidentifikuar në fund të vitit 2019.
Ndërsa numri i të infektuarve ditorë vijon të mbetet i lartë shumë vende kanë ashpërsuar masat për të parandaluar përhapjen e pandemisë. Në një urdhër i lëshuar nga Qendra Amerikane për Kontrollin dhe Parandalimin e Sëmundjeve thuhet se mbajtja e maskës mbrojtëse do të behet e detyruar në transportin publik. Britania, Kanadaja, Franca, Gjermania, Portugalia dhe Republika Çeke janë në mesin e shteteve që kanë ashpërsuar masat kufizuese.