Kufizimet e rënda të Izraelit për ndihmat humanitare që hyjnë në Gaza dhe përdorimi i mundshëm i urisë si armë mund të përbëjë një krim lufte, tha sot OKB.
“Shkalla e kufizimeve të vendosura nga Izraeli për hyrjen e ndihmave në Gaza, si dhe mënyra në të cilën ai vazhdon të kryejë sulme mund të jetë përdorimi i urisë si një metodë lufte, e cila përbën një krim lufte”, tha Jeremy Lawrence, përfaqësues i Komisionerit të Lartë për të Drejtat e Njeriut, gjatë një konference të rregullt për shtyp në selinë e OKB-së në Gjenevë.
Izraeli ka mohuar se po bllokon hyrjen e ndihmave humanitare në Rripin e Gazës.
Ndërkohë, në Gaza, ministria e shëndetësisë e Hamasit në enklavën palestineze njoftoi sot se të paktën 31.819 palestinezë janë vrarë dhe 73.934 janë plagosur që nga 7 tetori në ofensivën ushtarake izraelite në Gaza.
Nëntëdhjetë e tre palestinezë u vranë dhe 142 u plagosën në 24 orët e fundit, sipas të njëjtit burim. /vizionplus.tv