Nuk ndalen protestat kundër masave anticovid. Mijëra njerëz mbushën rrugët e Vjenës për të kundërshtuar kufizimet e reja kundër përhapjes së pandemise.
Protestuesit bllokuan rrugën qendrore të kryeqytetit të Austrisë duke mbajtur qirinj në duar dhe duke ndezur dritat në telefonat e tyre.
Sipas demonstruesve ky veprim simbolizonte pasojat e masave të reja që ka ndërmarrë qeveria, ku është urdhëruar mbyllja totale në orën 22:00.
Shumë protestues refuzuan të mbanin maska, megjithëse kjo është e detyrueshme sipas rregullave.
Mijëra njerëz dolën edhe në Bruksel për të kundërshtuar mbylljen e institucioneve kulturore si kinematë dhe teatrot.
Ndërsa disa luanin në instrumente muzikore, demonstruesit hidhnin parulla kundër autoriteteve.
Qeveria ka shtuar masat pasi numri i infektimeve është dyfishuar gjatë javës së kaluar.
Hapësirat e brendshme si kinematë, teatrot, sallat e koncerteve dhe konferencave do të qëndrojnë të mbyllura ndërsa aksesi i publikut në stadiume dhe ngjarje sportive do të ndalohet.
Panairet për festat në natyrë mund të mbeten të hapura me kapacitet të kufizuar, por parqet argëtuese do të mbyllen.