Pas javësh të ngjeshura me takime diplomatike, Rusia nuk heq dorë nga stërvitjet ushtarake duke shtuar praninë e trupave jo vetëm pranë kufirit me Ukrainën por edhe në shtetet fqinje.
Në Bjellorusi kanë mbërritur komandantët e lartë ushtarakë rusë, të cilët do të mbikëqyrin 30,000 trupa ruse gjatë një stërvitjeje ushtarake 10 ditore me ushtrinë bjelloruse.
Rusia ka dërguar për stërvitje në Bjellorusi dy sisteme raketore tokë-ajër, S-400 dhe avionë të shumtë luftarakë. Stërvitja në Bjellorusi është kërcënimi më i fundit ndaj Ukrainës, kryeqyteti i së cilës, Kievi, ndodhet vetëm 210 kilometra në jug të saj. Moska gjithashtu ka dërguar anije luftarake në Detin e Zi dhe ka grumbulluar më shumë se 100,000 trupa përgjatë krahut lindor të Ukrainës.
Zëdhënësi i Kremlinit Dmitry Peskov tha se Rusia po organizonte stërvitje të përbashkëta me Bjellorusinë për t’u përballur siç tha ai, me kërcënimet e pashembullta ndaj sigurisë.
Po kështu edhe qeveria e Ukrainës njoftoi një stërvitje ushtarake 10-ditore, që gjithashtu ka nisur këtë të enjte, dhe do të përdoren avionë pa pilot e raketa antitank të furnizuara nga aleatët perëndimorë të Kievit.
Ekspertët perëndimorë të zbulimit kanë deklaruar se Moska tashmë ka dislokuar 70% të kapacitetit të saj ushtarak për një pushtim të plotë të Ukrainës.