Agresioni i Rusisë në Ukrainë vë në pah urgjencën dhe rëndësinë e punës së Uashingtonit për të ndihmuar shtetet e Ballkanit Perëndimor që të arrijnë aspiratat e tyre për integrim evropian dhe anëtarësim në institucionet euroatlantike.
Kështu u shpreh një zëdhënës i Departamentit amerikan të Shtetit për Radion Evropa e Lirë teksa iu përgjigj pyetjes nëse Shtetet e Bashkuara ndajnë shqetësimin me Bashkimin Evropian sa i përket një deklarate të bërë nga presidenti ukrainas, Volodymyr Zelensky, i cili ka thënë se Moska dëshiron të nxisë konflikt në Ballkanin Perëndimor.
“Shtetet e Ballkanit Perëndimor dhe të gjitha shtetet në Evropë, kanë një interes të madh në rezultatin e luftës së Rusisë ne Ukrainë, luftë që kërcënon themelet e rendit dhe sigurisë ndërkombëtare. Prandaj, është thelbësore që ne të vazhdojmë të qëndrojmë së bashku përballë agresionit të Rusisë.”
Departamenti i shtetit deklaroi se Uashingtoni po punon me vendet e Ballkanit Perëndimor dhe me partnerët evropianë, që të avancohet ne sundimin e ligjit dhe të kryen reformat kundër korrupsionit.
“Sanksionet e shpallura nga Departamenti i Shtetit dhe i Thesarit të enjten synojnë pikërisht këtë te godasin ndërlidhjen e ndikimit malinj rus dhe korrupsionit. Që të dyja këto pengojnë përpjekjet e rajonit për të lëvizur drejt anëtarësimit në BE dhe drejt një të ardhme më prosperuese.”
Presidenti i Ukrainës Volodimir Zelensky u shpreh se ai ka prova të synimeve të Moskës për të nisur një luftë ne Ballkanin Perëndimor. Qëndrimit të tij iu bashkua edhe Bashkimi Europian. Zëdhënës i unionit, Peter Stano, deklaroi se Brukseli vazhdimit ka paralajmëruar se Rusia po bën përpjekje për të ushtruar ndikim malinj në Ballkanin Perëndimor.