Edhe këtë mëngjes Gaza u zgjua nga bombardimet izraelite. Tanket vijuan përparimin e tyre në spitalin Al-Shifa , në zemër të qytetit. Si pasojë e sulmeve intensive infrastruktura në zonë është shkatërruar plotësisht.
60% e qendrës spitalore ndodhet jashtë funksionit për shkak të mungesës së karburantit, ndërsa pacientët janë lënë në mëshirë të fatit.
Mediat bëjnë me dije se të paktën 50 civile janë vrarë në Rripin e Gazës, ndërsa dhjetëra të tjerë janë plagosur. Ushtria nuk ka kursyer as bluzat e bardha.
Shoqata e Gjysmëhënës së Kuqe të Palestinës ka shpërndarë një video tronditëse në rrjete sociale që tregon momentet kur mjekët dhe ambulancat u vunë nën bombardime në spitalin Al-Awda në veri të Gazës.
Sulmet nuk janë ndalur as në Bregun Perëndimor ku 60 palestineze janë arrestuar nga forcat izraelite.
Në këto kushte Këshilli i Sigurimit i Kombeve të Bashkuara miratoi rezolutën e parë që nga shpërthimi i luftës Izrael-Hamas.
Rezoluta bën thirrje për “pauza urgjente dhe të zgjatura humanitare” në Gaza. Në votim vetëm Shtetet e Bashkuara, Mbretëria e Bashkuar dhe Rusia abstenuan. Ambasadori izraelit në OKB deklaroi se rezoluta e miratuar nga Këshilli i Sigurimit që kërkon ndalimin e luftimeve në Gaza nuk ka asnjë kuptim, duke e quajtur atë të shkëputur nga realiteti.