Sekretari i Përgjithshëm i NATO-s, Jens Stoltenberg tha se nuk është vonë që Ukraina të fitojë luftën kundër Rusisë, me kusht që Perëndimi të mbajë premtimin dhe t’i dërgojë më shumë armë.
“Në muajt e fundit, aleatët e NATO-s nuk kanë ofruar mbështetjen që kanë premtuar”, tha Stoltenberg në një fjalim në ceremoninë e ndarjes së çmimeve për lidhjet transatlantike në Berlin.
“Por nuk është tepër vonë që Ukraina të fitojë, sepse një mbështetje më e fortë është në rrugë e sipër. Tani është përgjegjësia jonë që t’i kthejmë angazhimet në shpërndarjen aktuale të armëve dhe municioneve dhe ta bëjmë atë shpejt”, shtoi ai.
Të premten e kaluar, presidenti ukrainas Volodymyr Zelensky i bëri thirrje NATO-s që të dorëzojë armë sa më shpejt të jetë e mundur në Ukrainë, e cila nuk mund të presë më për shkak të presionit rus. Aleatët premtuan të rrisin mbështetjen.
Stoltenberg mirëpriti faktin që Kongresi Amerikan miratoi një plan të madh për ndihmën ushtarake amerikane për Ukrainën prej më shumë se 60 miliardë dollarësh, si dhe premtimet e vendeve të tjera, përfshirë Britaninë e Madhe, Gjermaninë dhe Holandën. /vizionplus.tv