Persona të armatosur që prezantoheshin si talebanë sulmuan të ftuarit në një dasmë në Afganistan. Ata kërkuan që të fiknin muzikën dhe vranë tre persona.
Zëdhënësi i qeverisë talebane, Zabihullah Mujahid tha të shtunën se dy nga tre sulmuesit ishin arrestuar dhe mohoi pretendimet se ata po vepronin në emër të lëvizjes islamike.
“Mbrëmë, në dasmën e Haji Malang Janit në fshatin Shamspur Mar Ghundi të Nangarharit, tre persona që u prezantuan si talebanë hynë në dasmë dhe kërkuan që muzika të ndalej. Si pasojë e të shtënave, të paktën tre persona janë vrarë dhe disa të tjerë janë plagosur”, tha ai.
Qazi Mullah Adel, zëdhënës i guvernatorit taleban në provincën Nangarhar, konfirmoi incidentin, por nuk dha detaje. Një i afërm i viktimave tha se luftëtarët talebanë kishin hapur zjarr ndërsa po luhej muzika.