Rusisë i kanë mbetur vetëm 6 avionë spiunë A-50. Kështu ka deklaruar zyrtari ukrainas i mbrojtjes Kyrylo Budanov këtë të dielë.
Avioni Beriev A-50, është përdorur nga Rusia për të ndihmuar në monitorimin e mbrojtjes ajrore të Ukrainës, shkruan Newsweek. Ai zakonisht fluturon me një ekuipazh deri në 15 persona dhe vlerësohet të kushtojë mbi 300 milionë dollarë për t’u prodhuar.
Deklarata e tij vjen pasi të premten, Forcat Ajrore të Ukrainës pretenduan se kishin rrëzuar një A-50U mbi Detin Azov pranë qytetit të Primorsko-Akhtarsk. Pavarësisht këtyre pretendimeve nga zyrtarët ukrainas, blogerët ushtarakë rusë më vonë pohuan se ai “u rrëzua aksidentalisht”.
Newsweek shkruan se nuk mundi të verifikonte në mënyrë të pavarur pretendimet e bëra nga Budanov. Zyrtarët rusë nuk kanë konfirmuar apo mohuar ende pretendimet e Ukrainës për avionët e saj A-50.
Ndërkohë, qeveria ukrainase ka pretenduar se ka bërë hapa të rëndësishëm në shkatërrimin e pjesëve të tjera kyçe të pajisjeve ushtarake ruse./vizionplus.tv