Olena Zelenska, bashkëshortja e presidentit ukrainas, Volodymyr Zelensky ka vendosur që të qëndrojë në Ukrainë së bashku me dy fëmijët e saj Aleksandra, 17 vjeçe dhe Kiril, 9 vjeç.
Ata janë të strehuar në një vend sekret nga ku Olena mbështet bashkëshortin dhe popullin e saj me anë të reagimeve në rrjetet sociale.
“Unë jam Olena Zelensky, jam gruaja e presidentit ukrainas, Volodymyr Zelensky. Ne u martuam në 2003-shin. Vajza jonë lindi në 2004 dhe djali në 2013. Unë jam një shkrimtare dhe një arkitekte. Dhe jam nën kërcënimin e vdekjes nga zoti Putin”, është një postim i saj i bërë së fundmi.
Në postime të tjera, Olena tregon se si e mbështet popullin e saj: “Unë nuk do lë të më zërë paniku ose të shpërthej në lot. Do jem e qetë dhe e sigurt.
Fëmijët më shikojnë dhe unë do të qëndroj pranë tyre dhe pranë burrit tim. Por edhe pranë jush. Ju dua dhe dua Ukrainën”.
Sakaq, presidenti Volodymyr Zelensky protagonisti i qëndresës dhe heroizmit ukrainas kundër sulmeve ruse, është shprehur se ka frikë për familjes e tij.
Në një intervistë televizive, Zelensky zbuloi se e takoi familjen e tij vetëm një herë në këto ditë të luftës për Ukrainën.