Ministri i Punëve të Jashtme të Republikës së Maqedonisë së Veriut, Bujar Osmani kishte fjalim dhe sesion për pyetje dhe përgjigje me eurodeputetët – anëtarë të Komisionit për Punë të Jashtme të Parlamentit Evropian- AFET, informojnë nga MPJ.
Nga atje thonë se Osmani para anëtarëve të Komisionit dha pasqyrë të detajuar për rrjedhën e zbatimit të reformave kyçe në vend, si dhe në përkushtimin tonë në ndërtimin e urave të fqinjësisë së mirë, bashkëpunimit rajonal dhe ndërkombëtar, me qëllim mundësimin e perspektivës së dukshme dhe të arritshme evropiane:
“Nëse definicioni evropian për progres i një vendi është: të ketë sukses për të rilindur frymën e aspiratave dhe hapjes, në vazhdimësi të ndërmerr hapa për konsolidimin e demokracisë së saj, t’i kultivojë dhe avancojë raportet ndëretnike, të kthejë sundimin e së drejtës dhe besimin institucional, të rritë transparencën e proceseve të sjelljes së vendimeve, të ketë sukses në vendosjen e kontrollit përkatës dhe baraspeshës mbi pushtetin ekzekutiv dhe të bëhet faktor i stabilitetit në rajon përmes kapërcimit të çështjeve të hapura bilaterale, atëherë Maqedonia e Veriut, në pajtim me të gjitha kriteret, padyshim meriton mbajtjen e Konferencës së parë ndërqeveritare me Bashkimin Evropian deri në fund të këtij viti, pas vendimit të Këshillit në mars të vitit 2020 për fillim të negociatave për aderim, vendim i sjellë pa kushte shtesë për vendin tonë”, theksoi Osmani.
Paraqitja e shefit të diplomacisë para njerëzve të parë të Punëve të Jashtme të Parlamentit Evropian dhe diskutimi i gjatë me eurodeputetët, ishte në funksion të kërkimit mbështetje dhe inkurajim për Maqedoninë e Veriut që të vazhdojë trendi pozitiv i ndryshimeve, me qëllim të vizionit të qartë dhe të pastër për vendin, të fillojë negociatat për anëtarësim të ardhshëm në Bashkimin Evropian.
“Unë si politikan nuk besoj në konflikte të ngrira, vetëm në zgjidhje të ngrira! Kemi nevojë për recetë për sukses, e jo për katastrofë. Qëllimi i bisedimeve me Bullgarinë fqinje është që të kthehet besimi tek procesi, të tejkalohen sfidat të cilat dalin nga interpretimet e ndryshme dhe të gjenden pika të afrimit dhe shënimin e përbashkët të ngjarjeve historike dhe personaliteteve. Respekti i ndërsjellë dhe mirëkuptimi duhet të jenë bazë e çdo miqësie të vërtetë. Kështu e shohë këtë problem, kështu edhe do ta kalojmë, me diplomaci dhe dialog”, tha Osmani.
Ministri para deputetëve prezantoi edhe arritjet e vendit në reforma gjatë periudhës së kaluar, duke shfrytëzuar mundësinë për të njoftuar për rinovimin dhe përforcimin e fokusit në ofrimin e rezultateve nga fusha e sundimit të ligjit dhe luftës kundër korrupsionit në 100 ditët e para të qeverisjes së Qeverisë së re.
Në takimin e Komisionit u prezantua edhe drafti fillestar nga Rezoluta e Parlamentit Evropian për progresin e vendit, e përgatitur nga raportuesi, eurodeputeti, Ilhan Kyuchyuk, ku përshëndetet progresi bindës dhe i vazhdueshëm i Maqedonisë së Veriut në procesin eurointegrues./Telegrafi/
Osmani: Nuk besoj në konflikte të ngrira, vetëm në zgjidhje të ngrira shkruan Telegrafi.