Ministrja e Ekonomisë Delina Ibrahimaj e ka cilësuar ndërhyrjen e qeverisë dhe ngritjen e bordeve si të nevojshme për të shmangur abuzimet.
Pas mbledhjes së qeverisë, Ibrahimaj u pyet nga gazetarët lidhur me Bordin e Karburanteve, nëse do të merret apo jo vendimi për ta shfuqizuar, njësoj siç ndodhi me atë të ushqimeve pas vendimit të dhënë nga Gjykata Kushtetuese.
Ajo theksoi se pritet të zhvillohet një seancë e dytë lidhur me këtë çështje, dhe më pas do të operohet në bazë të vendimit.
“Pritet një seancë e dytë dhe në bazë të vendimit do të veprohet, Por unë e theksoj se ndërhyrja e qeverisë ishte e detyrueshme duke parë që kishte luhatje të çmimeve dhe për të mos lejuar edhe abuzimin me tregtar”, tha ajo.
Ministrja Ibrahimaj ka thënë gjithashtu se me VKM-në e miratuar ditën e sotme, qeveria detyron të gjitha bizneset private që të punësojnë persona me aftësi të kufizuar.