Ministri i Brendshëm, Taulant Balla, ka vlerësuar punën e uniformave blu që arrestuan anëtarët e një grupi kriminal në Vlorë. Ai shkruan se qytetarët presin ende më shumë punë për të garantuar sigurinë e tyre, ndërsa shton se beson që Policia e Shtetit do të bëjnë detyrën në zbardhjen e ngjarjeve kriminale.
“Policia e Shtetit ka goditur grupe kriminale me rrezikshmëri të lartë, të përshirë më parë në ngjarje kriminale të rënda, në Vlorë dhe Shkodër. Kam besim se Policia e Vlorës dhe ajo e Shkodrës do të bëjnë detyrën në zbardhjen e ngjarjeve kriminale të reja dhe më të vjetra për vendosjen para drejtësisë të personave të dyshuar. Qytetarët e Vlorës dhe Shkodrës presin prej nesh garantimin e rendit, sigurisë publike dhe parandalim të ngjarjeve kriminale. Presim më shumë rezultate!”, shkruan Balla.
Policia e Vlorës vuri në pranga dy persona të armatosur në një kafe të lokalit. Të arrestuarit janë pjesë e një grupi kriminal në këtë qytet.