Edhe pse ka vite që flitet, ende nuk është konkretizuar një skemë sigurimi që do të “shpëtonte” bujqësinë nga ndryshimet klimatike, që shoqërohen me dëme të mëdha. Edhe në nismën e fundit të qeverisë, për të siguruar shtëpinë nga tërmeti, bujqësia është lënë jashtë vëmendjes. Eduard Sharka, ish-kreu i Sindikatës së Fermerëve në një intervistë për Vizion Plus, thotë se shteti duhet të ndjekë shembullin e Kosovës.
“Mund t’ju them me siguri se dëmet që shkaktohen nga ndryshimet e klimës dhe mungesa e rikuperimit të tyre, pasi nuk ka një skemë sigurimi është një nga arsyet pse bujqësia braktiset. Ndër vite, dëmet kapin shifrën e miliona eurove. Qeveria duhet ta mendojë seriozisht një skemë sigurimi për sektorin, pasi aktualisht kostot e një primi të tillë dalin shumë të papërballueshme, nëse fermerët sigurohen në mënyrë individuale. Në Kosovë është qeveria ajo, e cila paguan këtë prim për fermerët, derisa të arrihet një numër i caktuar qytetarësh që bëhen pjesë e skemës dhe çmimi i policës së sigurimit ulet.- u shpreh Sharak në E-ZONE
Ekspertët thonë se qeveria ka konceptuar një nisëm ligjore të cunguar, pasi duhet të ketë një sigurim në tërësi nga katastrofat natyrore dhe jo vetëm për tërmetin.