Kreu i grupit parlamentar të PS, Taulant Balla, ka paraqitur në Kuvend një draft rezolutë “për kujtimin dhe nderimin e viktimave të genocidit në Srebrenicë”.
Para mediave ai tha se drafti pritet të miratohet në seancën parlamentare të 7 korrikut. Balla theksoi se në ditët në vijim do të ketë një dokument tjetër që lidhet me luftën në Kosovë për të ngritur lart vlerat e UÇK.
“Kemi depozituar një dokument shumë dinjitoz. Një qendrim që Kuvendi do të mbajë përmes miratimit të rezolutës. I referohet tre rezolutave që ka miratura Parlamenti Europian, i cili ka shpallur 11 korrikun si datën e përkujtimit të genocidit serb. Shqipëria është anëtare e përkohshme e OKB, me qëllime konseguente. Në këtë dokument theksohet qartë qëndrimi i qeverisë shqiptare. Në ditët në vijim do të kemi një dokument tjetër që lidhet me luftën në Kosovë për të ngritur lart vlerat e UÇK”, tha Balla.