Pas 7 orësh seancë maratonë përballë Kolegjit të Posaçëm të Apelimit, drejtuesja e Prokurorisë së Tiranës, Elisabeta Imeraj, do të vijojë përballjen edhe ditën e nesërme me të njëjtin kolegj.
Në përfundim të seancës, ajo u shpreh se herët a vonë, e vërteta do të dalë në shesh.
“Nuk ka asnjë lloj akuze që mbetet e pazbardhur jam e sigurt që në kuadër të mekanizmave ligjor të duhura, e vërteta do të dakë në shesh. Nuk është e rëndësishme çfarë shpresoj unë, e rëndësishme është të zbardhen të gjitha elementet e paqartë të gjykimit tim.”
Seanca është shtyrë për të enjten në orën 12:30. Ajo vjen pasi vendimi i Komisionit të Pavarur të Kualifikimit, për të kaluar vettingun, u ankimua nga Komisioneri Publik.
Ky i fundit u vu në lëvizje me një ankesë zyrtare të bërë nga përfaqësuesi i Operacionit Ndërkombëtar të Monitorimit. Ai kishte kërkuar që prokurorja Imeraj të rivlerësohet në të treja kriteret.