Një ndër dilemat më të mëdha të njerëzve tani është nëse vaksina do të bëhet pengesë për të udhëtuar. Shtetet po vënë në zbatim pasaportën e vaksinimit, për të lëvizur lirshëm ata që janë imunizuar nga COVID-19.
Por Drejtoresha e Institutit të Shëndetit Publik, Albana Fico zbuloi se kjo nuk do të thotë se ata që nuk janë vaksinuar, nuk do të udhëtojnë.
Në një intervistë në studion e “7 pa 5” në “Vizion Plus”, me moderatoren Hilda Gorica, Fico tha se ky grup duhet vetëm t’iu nënshtrohet masave anti-COVID.
“Nuk ka asnjë kufizim për lëvizjen në BE. Biseda e pasaportës së vaksinimit përfshin edhe elementë si persona që nuk e kryejnë vaksinën për një arsye apo tjetër sepse kështu kanë zgjedhur, duke përfshirë edhe ata që nuk duan ta bëjnë apo e kanë të pamundur. Nuk mund të përjashtohen këta persona. Çdo shtet, duke u nisur nga situata e vet epidemiologjike, ka të drejtë të vendosë rregulla që do të mbajnë situatën nën kontroll. Por t’i mund të lëvizësh normalisht, përfshirë edhe udhëtime jo-esenciale.”
Sa i përket vaksinimit në Shqipëri, Albana Fico tha se procesi po ecën me ritme të kënaqshme dhe u kujdes të theksonte se të gjitha vaksinat janë efektive.