Grupet kriminale po shfrytëzojnë mungesën e energjisë elektrike në akset rrugore, në mënyrë që të mos të identifikohen nga policia.
Ekspertët e kriminalistikës i referohen edhe vrasjes mafioze në autostradën Tiranë-Durrës ku u ekzekutua Iljaz Çali. Në këtë aks rrugor duhej të kishte ndriçim, gjë që mund të ndihmonte hetuesit për identifikimin e autorëve.
ARTAN REXHEPI
EKSPERT KRIMINALIST
“Ndërprerja e energjisë elektrike në akset rrugore përveç rritjes së riskut të madh të aksidenteve, që në fund të fundit edhe ato janë vepra penale, rrit edhe mundësinë e ekzekutimeve dhe krimeve si dhe moszbulimin e autorëve. Këto për hir të vërtetës janë zbuluar nga kamerat e sigurisë që nuk është meritë e qeverisë, por e bizneseve që i kanë instaluar për sigurinë e tyre.”
Rexhepi analizon dhe metodën që vrasësit përdorin në këto ekzekutime mafioze, gjë që me mungesën e ndriçimit ka ndryshuar.
“Zakonisht këto vrasjes e kësaj natyre në momentin që ka patur ndriçim në rrugë, janë shoqëruar me djegie automjetesh. Në Rinas nuk kemi patur djegie automjeti, pasi ose automjeti ka qenë i shtrenjtë dhe e kanë gjykuar që mos ta eleminojnë, ose kanë patur sigurinë që nuk do të zbulohen për shkak të mungesës së ndriçimit.”
Ndër të tjera, ekspertët shtojnë se fikja e ndriçimit në akset rrugore nuk ka kosto të madhe e për pasojë nuk sjell kursim të energjisë elektrike, ashtu siç pretendon qeveria.