I pyetur nga gazetarët nëse i druhet një “tradhtie” nga ana e kryedemokratit Lulzim Basha pas kërkesës së ambadores Yuri Kim që të mos jetë pjesë e Parlamentit të ri, ish-kryeministri Sali Berisha e mohoi diçka të tillë.
Në një konferencë për mediat, ai zbuloi se gjatë takimit të para disa ditëve mes Bashës dhe Kim, lideri i demokratëve ka kërkuar vetëm prova për shpalljen “non grata” të tij.
“Kryetari i PD-së i është përgjigjur kërkesës së zonjës Kim me kërkesën e tij për të paraqitur fakte, dokumente, prova. Kjo është përgjigja që ka marrë zonja Kim nga kryetari i PD-së, e falënderoj dhe e përgëzoj. Kjo është e vetmja kërkesë që unë kam. Nuk kam kërkesë për rrëzimin e vendimit. Ambasadorja sillet si një guvernatore, qoftë në marrëveshjet që nxit dhe ndërmjetëson që shkelin Kushtetutën dhe ligjet e vendit.”