Një bombul gazi ka shpërthyer këtë pasdite në katin e tretë të një pallati në lagjen “Besëlidhja” në Lezhë. Në momentin e shpërthimit në banesë kanë qenë një çift të moshuarish, ku nga flakët e gazit ka marrë dëmtime Shtjefen Tushi 91 vjeç. Ai ka qenë duke pjekur kafe në momentin e shpërthimit.
Nga burimet bëhet me dije se i moshuari ka marrë lëndime në duar në përpjekje për të fikur zjarrin në banesë. Tushi u dërgua menjeherë në spitalin e Lezhës. Falë ndërhyrjes së menjëhershme të zjarrfikësve, u bë i mundur neutralizimi i flakëve të zjarrit.
“Rreth orës 19:00, në lagjen “Besëlidhja”, Lezhë, në banesën e shtetasit Sh. T. 91 vjeç, ka shpërthyer një bombël gazi (bombël e vogël kafeje), ku si pasojë ka marrë dëmtime të lehta fizike 91-vjeçari, i cili është dërguar në spital për ndihmë mjekësore dhe ndodhet jashtë rrezikut për jetën”, njofton policia.
Grupi hetimor ndodhet në vendngjarje ku vazhdon veprimet hetimore për sqarimin e plotë të rrethanave të rastit./vizionplus.tv