Demokrati Fatbardh Kadilli reagoi për situatën e rëndë të krijuar nga zjarret në Karaburun, por jo vetëm.
Në rrjetet sociale, ai deklaroi se zjarret mund të parandalohen nëse merren masa paraprake.
Diçka të tillë, sipas tij, qeveria nuk e ka bërë dhe prandaj hidhen sytë nga fqinjët.
“Zjarret nuk shuhen me mbledhje pasi janë ndezur. Zjarret nuk shuhen me mbledhje. Zjarret parandalohen. Kapaciteti kontrollues i zjarreve planifikohet. Por zjarret kanë përfshirë vendin. Pas Fierit, një katastrofë ekologjike, Karaburuni po bëhet shkrumb. U bënë tashmë dekada që jemi në hartën e zjarreve të stinës së nxehtë. Por, ende kapacitetet parandaluese dhe ato kontrolluese i kemi me “inshallah” nuk bie zjarr. Ja që bie, ja që ndonjë dhe e ndezim vetë. Një helikopter nuk mjafton. Të presim radhën kur të shuhen zjarret gjetke nuk është zgjidhje. As fakti që zjarre bien kudo nuk është përgjigje. Përgjigje janë masat e munguara parandaluese dhe kontrolluese. Mbështetje maksimale për ata që luftojnê me zjarret. Por, e pafalshme për qeverinë. Dëmi ekologjik, material është shumë më i shtrenjtë se helikopterët dhe mjetet moderne. E pamë dhe gjatë tërmetit këtë neglizhencë.”