Në studion e “Quo Vadis” deputetja e LSI, Erisa Xhixho u shpreh se vendi ndodhet në një situatë shumë kritike përsa i përket shtimit të rasteve të abuzimeve seksuale.
Një ditë më parë, Xhixho prezantoi nismën ligjore për regjistrimin kombëtar të të dënuarve për krime seksuale. Deputetja e LSI-së theksoi se kjo nismë vjen pas ngjarjeve të ditëve të fundit ku fëmijët kanë rënë pre e abuzimeve seksuale. Sipas saj, regjistri do të jetë një mjet efektiv për të identifikuar vendndodhjen e të dënuarve për krime seksuale dhe monitorimin e aktivitetit të tyre, si dhe punësimin e tyre në institucione.
“Jemi në një situatë shumë kritike të shoqërisë. Marr parasysh edhe raporte të organizatave të shoqrisë civile. Si draft ide ka qenë në 2013. Është bashkëpunim e CRCA që merret me të miturit dhe të drejtat e tyre, një projektligj i konsultuar me mua si një person i cili advokon të drejtat e njeriut, të grave. Nuk është dicka familjare, por është një çështje shoqërore e të gjithëve ne prandaj duhet të jemi bashkë për disa kauza. Unë kam marrë pjesë në protesta të shumta të shoqërisë civile, e cila ka advokuar pasjen e një regjistri të tillë nisur kjo edhe nga eksperienca e Bashkimit Europian”, u shpreh Xhixho.