Seanca e shqyrtimit të ankimimit të Partisë Demokratike për konfiskimin e kateve pa leje është shtyrë sërish nga Gjykata Kushtetuese. Bëhet fjalë për një vendim të Këshillit të Ministrave, të cilin PD e konsideron si ilegjitim dhe favorizues për ndërtuesit e objekteve të mëdha.
Shkak për shtyerjen e seancës është bërë pretendimi i Gjykatës Kushtetuese se deputetët që kanë firmosur për këtë ankimin, duhet po ashtu të firmosin autorizimin për përfaqësuesin e tyre ligjor, Marash Logun.
Më herët seanca u shty pasi gjykata arsyetoi se PD i mungonin firmat e nevojshme, pasi 2 nga 28 deputetët që hodhën firmat e tyre, tanimë ishin dorëhequr.
Partia Demokratike se vendimi i qeverisë për konfiskimin e kateve pa leje cënon barazinë e shtetasve përpara ligjit, cënon hierarkinë e akteve normative dhe nuk është autorizuar nga ligji.
Gjithashtu PD pretendon se vendimi është në kundërshtim me Kodin Penal, sepse i jep amnisti penale një kategorie personash, pa ligj të miratuar me 3/5 e votave në Kuvend.