Krimi vijon të trondisë vendin. Në 8 muajt e fundit janë regjistruar mbi 40 atentate.
Vetëm në 12 orët e fundit, u shënuar 4 viktima, ndërsa policia ka intensifikuar kontrollet.
Sot uniformat blu kan ë sekuestruar një arsenal të madh armësh, municione luftarake, makina të blinduara dhe granata në zonën e Mzezit në Tiranë.
Policia njoftoi se përmes rrugës operative kishin marrë sinjalizimin se në një garazh mbaheshin armë të ndryshme, dhe pas kontrollit arrestuan 62 vjeçari Kujtim Çaushi, pronar i garazhit, si dhe është shpallur në kërkim djali i tij Erlind Çaushi 35 vjeç.
Por kjo nuk është hera e parë që policia zbulon magazinat me arsenal armësh, por hera e gjashtë.
Kujtojmë se në në muajin korrik 2022 janë zhvilluar dy aksione, konkretisht në datat 13 dhe 27.
Në datën 13 korrik dy persona kanë rënë në prangat e policisë pas zbulimit të një arsenali armësh në shtëpitë e tyre. Bëhet fjalë për dy të rinj, Kristian Gjini, 25 vjeç dhe Françeska Kolgjegja, 22-vjeçare. Pas kontrollit u konstatua se në emrin e Gjinit janë marrë dy shtëpi me qira dhe në njërën prej tyre banonte Françeska Kolgjegjaj.
Dy banesat ishin përshtatur për fshehjen e municioneve. Policia ka sekuestruar 7 armë zjarri, 4 silenciatorë, municion luftarak, krehra, lëndë narkotike, 2 radio policie, dorashka, 7 maska, një thikë, dokumente që dyshohen të falsifikuara, targa të huaja dhe 2 automjete.
Në datën 27 korrik, u arrestua ish efektivi i RENEA-s, i cili u kap me snajper me silenciator në makinë, që sipas policisë dyshohej se do përdorej për atentat.
Më 16 qershor 2022 në zonën e Mëzezit, policia arrestoi Ervis Bakallin dhe Dorian Kalon, të cilët prodhonin dhe modifikonin armë me qëllim që të përdoreshin nga grupet kriminale.
Vetëm një javë më vonë, në 21 qershor 2022 u zbulua edhe një tjetër shtëpi e përshtatur për prodhim të armëve në zonën e Liqenit të Thatë, ku në pranga ra Eno Beqiri.
Në 9 janar 2022 policia zbuloi një tjetër arsenal armësh në Peqin, ku si rezultat 3 persona kanë rënë në pranga.