Këtë të premte nisi trajnimi i 400 infermierëve që do të marrin pjesë në vaksinimin masiv të popullatës. Kryeministri Edi Rama dhe ministrja e Shëndetësisë, Ogerta Manastirliu deklaruan se përmes tyre, do të intensifikohet procesi i vaksinimit.
“Po bëhemi gati duke trajnuar 400 infermierë, mes të cilëve janë kryesisht aplikanëtët e rinj të portalit “Infermierë për Shqipërinë” dhe janë 100 infermierë të forcave të armatorsura. Ky trajnim do ti përgatisë ata për të kryer procesin e vaksinimit masiv në të gjithë vendin, duke ju shtuar mbi 1 mijë vaksinatorëve që ke kemi aktualisht në shërbim. Pra do të kemi 1500 vaksinatorë, ndihmës vaksinatorë, për vaksinimin në mënyrë kapilare, në të gjithë vendin’, tha Manastirliu.
Kurse Edi Rama falënderoi ekipin e vaksinatorëve dhe shtoi se së shpejti do të ketë lajme të mira për doza të tjera vaksine.
“Ne duam të jemi të super përgatitur që në sekondën e parë që ne do të disponojmë një sasi të konsiderueshme vaksinash dhe menjëherë, në të gjithë territorin, do të shtrijmë rrjetin e vaksinatorëve të fushatës ‘Shqipëria Buzëqesh’, që duhet të jenë më shumë se sa vaksinatorët që kemi aktualisht në qendra shëndetësore. Kjo është një eksperincë e jashtëzakonshme, e paharrueshme në jetën profesionale të një vajze apo djali që ka vendosur t’ia dedikojë jetën profesionale bluzës së bardhë.”