Të arrestuar si të dyshuar se po planifikonin një vrasje në Shëngjin, Nikoll Sherrniku dhe Flutura Berisha do të qëndrojnë në burg.
Masa e sigurisë për ta u dha këtë të shtunë nga Gjykata e Lezhës, pasi u vunë në pranga të mërkurën gjatë operacionit të koduar “Dyshimi” në Kune të Shëngjinit.
Gjatë aksionit, grupi i policisë po mbante nën vëzhgim një mjet tip “Toyota”, që ishte i parkuar në lagunën e Kunes. Kur panë efektivët të afrohen, Nikoll Sherrniku, që ishte në arrest shtëpiak për vrasjen e efektivit Xhulio Prela, Flutura Berisha dhe një 15-vjeçar tentuan të largohen me vrap.
Në momentin që u kapen nga policia, Flutura Berisha u përpoq të fshihte një kallashnikov së bashku me fishekët dhe dy radio policie, që dyshohet se ishin mjetet e tyre për të kryer vrasjen.
Autoritetet po vijojnë hetimet për të zbardhur aktivitetin e tyre kriminal.