Kryeministri Edi Rama ishte në sinkron me ministrin e Brendshëm, Bledi Çuçi kur komentoi për ngjarjet e fundit tragjike në vend dhe përgjegjësinë që ka Policia e Shtetit.
Rama tha në një komunikim me gazetarët se një rol kryesor në luftën ndaj kriminalitetit luajnë edhe gjyqtarët me dënimet e tyre.
“Policia e Shtetit nuk dënon, reagon, ndalon dhe çon përpara gjykatës persona që shkelin ligjin. Nëse mund të konsiderohet një arsye e një tragjedie fakti që personat e përfshirë në tragjedi kanë armë pa leje, patjetër që armëmbajtja pa leje këtu dënohet më rëndë sesa vendet e tjera të Evropës, nuk është Policia e Shtetit që mund të çojë në burg ata që i çon para gjykatësve dhe ata nuk i dënojnë as me minimumin që iu jep ligji. Duhet të bëhet demaskimi i këtyre gjykatësve. Janë fakte skandaloze që ndodhin. Policisë i hidhet faji për çdo gjë që ndodh. Ky është një ofendim shumë i madh. Ofendimi i madh që i bëhet policisë është një ofendim i përditshëm.”