Nga takimi me kryeministrin Edi Rama, peshkatarët morën si premtim rritjen e mbështetjes financiare. Për riparimin e flotës, ata do të ndihmohen nga shteti me një financim të drejtpërdrejte.
Pas një viti, angazhimi është që të nis ndërtimi i markatës së Durrësit pas asaj të Shëngjinit dhe Vlorës, ku të gjithë peshkatarët të kenë mundësi të grumbullojnë dhe të tregtojnë produktin e tyre detar. Përmbushjen e këtij premtimi ia la Roland Kristos, të cili i kërkoi të zgjohet nga gjumi nëse do të jetë ende zëvendësministër i Bujqësisë dhe Zhvillimit Rural.
Njëherësh me ndërtimin e markatës, kreu i qeverisë i kërkoi numrit dy të Ministrisë së Bujqësisë edhe ndërtimin e një shkolle profesionale e cila do të furnizojë me fuqi punëtore industrinë e peshkimit qe sot vuan mungesen e specialisteve dhe që janë të detyruar që një pjesë të konsiderueshme të ekipeve t’i marrin nga vende si Turqia dhe Egjipti.
Peshkatarëve u kërkoi që fondin prej 41 milionë euro që Bashkimi Evropian ka vendosur në mbështetje të këtij sektori ta shfrytëzojnë. Për këtë u sugjeroi që të ngrejnë në strukturë të tyren me ekspertë për të realizuar projekte me qëllim që të përfitojnë financimin për to.