Kryeministri Edi Rama ka folur për shembjen e pallateve në rrugën “Myslym Keta” në njësinë 4, gjatë një takimi në Baldushk ku u dorëzoi çelësat e shtëpive 28 familjeve.
Në fjalën e tij, Rama tha se pallati ishte një ngrehinë e rrezikshme dhe theksoi se të gjithë personave që jetojnë aty do u jepet bonusi i qirasë.
“Ai pallat bën mu që është një ngrehinë e rrezikshme. Që me një goditje të matrapikut binte dy kate përnjëherë, ndërkohë që të gjithëve atyre u jepet bonusi i qirasë dhe u thuhet bujrum, kur të ndërtohen apartamentet e reja do merrni një apartament.
Tani çfarë duhet të bëjë bashkia apo qeveria? Se kush i del për zot njerëzve në këtë vend ne e kemi treguar me prova. Ashtu siç kemi dhënë provat në këtë proces rindërtimi se tek shqiptarët në hall nuk shohim majtas apo djathtas, por shohim drejt e në sy secilin që gjithkush të marrë atë që i takon”, tha Rama.